Baucau, 18 jullu 2023 (TATOLI) – Autoridade suku Trilok, postu administrative Baucau vila remata ona implementa Programa Mão de Obra Postu Administrativu (PMOPA) faze dahuluk tinan 2023 nian.

Xefe Suku Triloka, Alexandre da Costa, esplika, programa refere finaliza iha loron-16 Jullu no traballadór sira simu ona orsamentu hosi postu administrative Baucau Vila nun’e hein atu kontinua implementa tan faze daruak hafoin reuniaun konsellu postu.

“ Maske la’ós ba komunidade hotu maibe benefísia on aba traballadór sira hodi ajuda sira nia ekonomia uma-laran,” Xefi suku triloka hateten iha Vila Antiga, tersa ne’e.

Alenxandre da Costa konsidera programa refere importante no rekomenda atu governu kontinua tanba Sistema implementasaun la liuhosi kompaña maibé direita ba komunidade hodi hadiá ekonomia uma-laran.

Suku Triloka implementa atividade limpeza jerál iha arreadór sedu suku, limpeza kampu futebool no limpeza Estrada iha suku ho durasaun serbisu loron-18 hodi total traballadór informal na’in-60 fahe ba grupu tolu.

Postu Baucau Vila sei hetan alokasaun orsamentu hamutuk rihun $100 ne’ebé aloka ba kustu operasionál rihun $5 no kustu atividade rihun $95 ne’ebé fahé bas uku 11 ho atividade faze rua no sei envolve traballadór hamutuk 931.

Totál orsamentu PMOPA ne’ebé aloka ba munisípiu Baucau tinan-2023 hamutuk rihun $600, kada postu administrative hetan alokasaun rihun $100, komposta hosi kustu operasionál pursentu 5 no kustu atividade pursentu 95 no sei envolve traballadór informal hamutuk 5.588.

Jornalista: Natalin Belo

Editór: Evaristo Soares Martins

Fontes: https://tatoli.tl/2023/07/18/suku-triloka-finaliza-ona-pmopa-faze-dahuluk/